En plen deth Conselh Generau d’Aran celebrat aguest maitin eth partit aranés a manifestat eth sòn refús ath talh dera N230 deth passat 2 de noveme e qu’ocasionèc grèus problèmes e pèrtes economiques ath sector comerciau e toristic aranés

Aguest maitin s’a amiat a tèrme eth plen ordinari deth Conselh Generau d’Aran en qué Unitat d’Aran a mostrat eth sòn refús ath talh de carretères amiat a tèrme eth passat dia 2 de noveme ena N230 e prebotjat peth CDR, coma mòstra de refús ar empresoament des membres deth govèrn dera Generalitat.

En aguest sens, Unitat d’Aran pense qu’ei de besonh respectar eth dret de toti es ciutadans a manifestar era sua disconformitat damb es decisions politiques o, en aguest cas, judiciaus. Un mauestar que compartíssen fòrça ciutadans.

Totun, entà UA, es mesures o accions que se posquen preveir tà manifestar aguest refús, non pòden afectar es interèssi economics e sociaus, e era libertat dera rèsta dera ciutadania, qu’encara patissen es efèctes dera crisi e dera baisha activitat que determinadi sectors an, especiaument en Baish Aran.

Es alcaldes de Vielha e Mijaran e Bossòst, atau coma eth Tinent d’Alcalde de Les, an expressat era sua disconformitat damb aguesti talhs qu’an provocat importants damnatges enes sectors comerciaus e dera ostalaria enes sòns municipis.

Aguest tipe d’accions non afavoríssen bric ath foncionament des activitats economiques e provòquen ua imatge negativa qu’afècte, non sonque ath moment puntuau, senon que contribuís a crear ua perjudiciau percepcion generau deth país qu’afècte a ua activitat tant sensibla coma ei era toristica e, per tant, pòt repercutir ena afloéncia de visitaires, en tot ocasionar atau un damnatge encara mès grèu. Atau madeish, des d’Unitat d’Aran s’a mostrat era preocupacion qu’aguesti talhs poguen produsir-se ena sason d’iuèrn e dificulten era tempsada toristica d’esquí.

Des deth grup d’UA en Conselh Generau d’Aran s’a instat ath Sindic d’Aran entà qu’amie a tèrme es gestions oportunes entà esvitar qu’aguestes accions se tornen a produsir e se demane as grops organizadors d’aguesti actes que cerquen d’autes vies entà manifestar-se que non perjudiquen ar interès economic e sociau deth país.

En aguest plen, Unitat d’Aran a votat favorablament ara modificacion de crèdit que prevé qu’eth Conselh Generau d’Aran destine 2 milions d’euros entà bastir era futura residéncia geriatrica de Les. Ua quantitat qu’aurà d’abonar integrament era maxima institucion aranesa, tot e qu’en 2010 eth còst des òbres de melhora e reabilitacion dera actuau residéncia Sant Antòni de Vielha siguec assomit pera Generalitat de Catalunya.