Dempus deth darrèr huec urban produsit eth dia 10 de hereuèr en municipi de Salardú, s’a tornat a evidenciar era importància qu’a eth temps de responsa en aguest tipe d’emergéncies. Era creacion d’un Parc de Pompièrs en Naut Aran ei ua longa reivindiacion des vesins d’aguest municipi que des d’Unitat d’Aran tanben se ven reclamant de hè ans.

Francés Bruna, còsso portaveu d’UA en Ajuntament de Naut Aran e Conselhèr Generau, explicaue que “i a municipis, coma Bagergue e Unha, que pòden arribar a auer un temps de demora d’entre 20 e 30 menutes dempús de dar er avís enquia qu’arribe eth prumèr camion de pompièrs”.

Cau rebrembar qu’era majoria de huecs urbans en Naut Aran s’an produsit en cases de dusau residéncia. En aguest sens Bruna higie que, “non ei sostenible qu’eth municipi tamb eth màger nombre de cases de dusaua residéncia e de poblacion flotant d’Aran non compde tamb un parc de pompièrs pròpri”.

Unitat d’Aran a reclamat en diuèrses ocasions ath long des darrèri ans eth bastiment d’un parc de pompièrs en aguest municipi, en tot auer en compde qu’er Ajuntament de Naut Aran compde dejà damb espacis disponibles entà plaçar-lo, hèt que n’abaratirie es còsti. Atau madeish, tanben demane que s’abilite personau volentari entà efectuar es servicis deth parc e atier es besonhs de manteniment deth madeish.

Hònt: Unitat d’Aran