Eth plen deth Conselh Generau d’Aran aprovèc aguest deluns, tamb eth vòt favorable d’Unitat d’Aran, era modificacion de crèdit que permeterà començar es òbres de melhora e reabilitacion dera futura residéncia geriatrica deth municipi de Les, e qu’anaràn integrament a cargue des arques deth Conselh Generau

Eth Conselh aprovèc ua modificacion de crèdit de 3,6 milions d’euros, des quaus 2 milions se invertiràn entà bastir era naua residéncia de gent grana. Eth conselhèr portaveu d’UA Francés Boya a senhalat que “tamb ues insfraestructures geriatriques que se ven superades pera demanda, èm conscients de qu’Aran a de besonh urgentament un equipament coma aguest”.

Totun eth convenciment d’UA de qu’aguesta residéncia ei de besonh, aguesta modificacion de crèdit provòque que eth hons de romanent de tresoreria deth Conselh qu’istoricament a estat tostemp de ath torn d’uns 5 milions d’euros, se veigue fòrça afectat en tot quedar disponible sonque ath torn d’un milion d’euros. En aguest sens, cau rebrembar qu’eth romanen de tresoreria ei eth hons deth que dispause eth Conselh entà afrontar possibles dificultats economiques qu’afècten ara gestion deth Conselh e ath desvolupament des sues competéncies.

Atau madeish Unitat d’Aran a lamentat qu’era Generalitat de Catalunya non assomisque cap còst en bastiment d’aguesta residéncia, en tot hèr qu’era maxima institucion aranesa afronte integrament era inversion.

En aguest sens cau destacar que, dempús de mès d’un an tamb negociacions entre eth Conselh e era Generalitat de Catalunya, a dia d’auer non existís cap acòrd entà fixar eth numerò de places concertades qu’aurà aguesta residéncia,  causa qu’ei imprescindibla entara viabilitat economica dera residéncia geriatrica.

Aguesta situacion contraste tamb çò que passèc pendent eth govèrn d’UA en Conselh Generau d’Aran en 2010, quan se inaugurèc era residéncia Sant Antòni de Vielha. Eth còst des òbres d’aguesta residéncia, qu’artenhec es 2,5 milions d’euros, siguec integrament assomit pera Generalitat de Catalunya, en tot creasse tanben es places sociosanitàries.

Entà Unitat d’Aran, eth Conselh Generau cor un gran risc en tot redusir tant eth romanen de tresoreria, per aguest motiu considère qu’era rèsta d’accions que s’an inclodit en aguesta modificacion poirien demorar ath pressupòst de 2018 evitant atau, ua reduccion tant drastica deth romanen.

Hònt: Unitat d’Aran