Unitat d’Aran denóncie qu’en tot qu’era rèsta de Catalunya començarà eth cors escolar damb 5.514 mèstres mès, era Generalitat a retalhat mès deth 20% deth professorat en Aran d’ençà deth cors 2011-2012

Era escòla damb mès alumnes de tota era Val d’Aran, era Escòla Garona de Vielha, comence aguest cors 2017-2018 damb ua fòrta retalhada en professorat, tot e qu’er escolanat se manten enes madeishes chifres qu’ans anteriors.

Aguesta retalhada en Aran contraste damb er aument de places de professorat qu’era Generalitat a practicat ena rèsta de Catalunya, a on s’an incrementat es plantilhes en un totau de 5.514 mèstres mès qu’er an passat.

Era Escòla Garona ei eth centre d’educacion infantila e primària mès gran dera Val d’Aran e eth dusau laguens des Servicis Territoriaus de Lleida, en tot acuélher 506 escolans des cicles d’educacion infantila e primària tad aguest cors 2017-2018. Totun enguan compdarà sonque damb 38 mèstres, dus mens qu’er an passat. Ad açò cau híger qu’eth cors 2011-2012 compdauen damb un totau de 49 mèstres e 520 escolans, sonque catorze mès qu’es actuaus.

“Se tiem en compde qu’era Escòla a demorat damb 11 mèstres mens quan era diferéncia d’escolans ei sonque de 14 comprobam qu’era retalhada a estat intolerabla, mès encara se consideram que se torne as madeishes ràtios de professorat qu’abantes de que se metesse en foncionament era sisau ora”, declaraue Maria Vergés, secretària d’Organizacion d’Unitat d’Aran, e higie que “non se compren qu’en tot qu’era rèsta de Catalunya comence eth cors damb mès mèstres qu’er an anterior, Aran ac hèsque damb mens, en tot menspredar-se atau era sua singularitat e especificitat”.

Atau madeish Vergés tanben manifestaue que “en moment politic e sociau que viuem, damb un govèrn dera Generalitat dedicat en exclusiva ara independéncia, en tot desbrembar es besonhs dera ciutadania e damb un govèrn deth Conselh Generau entregat totaument ara causa independentista e que non lhèue era veu deuant des constants mensprètz que patís Aran, resulte evident qu’eth tracte que recep eth nòste territòri ei totaument injust e injustificat e demòstre qu’eth benèster des ciutadans non ei ua prioritat entà andús govèrns”.

Hònt: Unitat d’Aran