Eth partit aranés considère indispensable que se daurisque ua via politica pròpria entà Aran a on es aranesi poguen decidir sus eth sòn futur e apòste fèrmament peth dialòg coma unica solucion ara situacion actuau en Catalunya

Unitat d’Aran a manifestat enes darrères setmanes era sua prigonda preocupacion pera actuau situacion en Catalunya e pes efèctes qu’aguesta podie auer en Aran.

Eth partit aranés a mostrat era sua inquietud peth previsible impacte qu’ua declaracion unilaterau d’independéncia pòt auer sus era economia e eth trabalh ena Val d’Aran, atau coma ja an alertat  enes darrèri dies estaments der àmbit otelèr e toristic aranés.

Entà Unitat d’Aran plaçar as nòstes institucions dehòra dera legalitat ei meter-les en un grèu risc de desparicion, quauquarren qu’eth país non se pòt perméter, dempús de que s’age trabalhat tant entà qu’aguestes institucions siguen reconeishudes, sustot en Aran.

Era societat aranesa patirie ena sua pròpria pèth es conseqüéncies d’aguesta secession unilaterau, ues conseqüéncies que, damb era gessuda dera Union Europèa, afectarien tanben a àmbits coma era sanitat (damb es convènis sanitaris damb França), eth comèrç de termièra o er ensenhament”, manifèste Paco Boya, Secretari Generau d’UA.

Es resultats deth referendum der un d’octobre en Aran meteren clarament de manifèst qu’era societat aranesa non ei partidària d’un trincament unilaterau de Catalunya damb era rèsta d’España, en tot dar-se ua situacion de contradiccion dera qu’Unitat d’Aran venguie alertant temps endarrèr: era de qu’es resultats en Aran diferissen en grana mesura des resultats en Catalunya. Cau rebrembar que, segontes era informacion balhada pera Generalitat, en Aran votèc eth 24% deth cens, damb un 19% des vòts a favor der “òc”. Ua situacion que finaument s’a dat e que evidéncie era manca de supòrt qu’er independentisme catalan a en Aran.

Atau madeish, tot e qu’Unitat d’Aran considère qu’eth govèrn de Convergéncia Democratica Aranesa en Conselh Generau d’Aran non a estat sufisentament contundent e implicat ena defensa des interèssi des aranesi pendent tot agues procès, hè ua crida ara unitat entà deféner er autogovèrn, identitat, lengua e cultura araneses atau coma era conviuença entre totes es persones que viuen e trabalhen en Aran, atau e coma a estat istoricament.

En aguest sens Boya declaraue que: “s’a de respectar era volontat des aranesi ja que s’a evidenciat que non son partidaris dera independéncia e demanar que s’aplique era Disposicion Addicionau dera Lei d’Aran de 2015 a on eth Parlament de Catalunya reconeish eth dret des aranesi a decidir eth sòn futur s’arribe eth cas”.

Finaument, des d’Unitat d’Aran se vò hèr ua crida ara serenitat e ara responsabilitat e s’inste ara recerca de solucions que non siguen traumatiques e qu’ajuden a destensar era situacion actuau e a garantir era conviuença en Aran e en Catalunya. Atau madeish, en paraules deth sòn Secretari Generau “èm partidaris e defensors deth dialòg coma maxim esturment entà superar eth conflicte e redusir era tension sociau. Avaloram positivament eth nau scenari que se presente en Catalunya qu’afavorís aguest dialòg e celebram era prepausa de reforma constitucionau anonciada per Pedro Sánchez aguest maitin”.

Hònt: UA