Eth Secretari Generau d’Unitat d’Aran liderarà era Secretaria de Montanha, que se centrarà enes ahèrs e problèmes deth mon rurau, e qu’un partit politic constituís per prumèr còp ena istòria.

En Congrès Federau deth PSOE celebrat aguesta dimenjada, a on Pedro Sánchez a estat escuelhut coma Secretari Generau deth PSOE, s’a aprovat tanben era naua executiva deth partit, a on eth Secretari Generau d’Unitat d’Aran a estat nomenat entà portar tà deuant era Secretaria de Montanha. Boya s’a mostrat satisfèt tamb era creacion d’aguest ambit especific des territòris de montanha laguens dera executiva deth PSOE. “Entrar a formar part dera naua executiva coma responsable dera Secretaria de Montanha, ei ua responsabilitat plan important en uns temps plan compulsi.  Era creacion d’aguesta secretaria dar visibilitat per prumèr viatge as territòris de montanha coma era Val d’Aran, qu’enquia ara an estat marginadi pera administracion”, explique Boya.

Mès deth 40% des territòris de Espanha son zònes de montanha, e patissen grèus problèmes de despoblacion e desequilibi demografic atau coma de manca d’oportunitats e desigualtats en comparacion damb zònes urbanes. “En Unitat d’Aran creiguem qu’aguesta ei ua grana oportunitat entà trabalhar e méter en valor es besonhs e rèptes dera nauta montanha e tà que Aran pogue esdevier un territòri pionèr e de referéncia en aguest ahèr. Atau madeish, mos daurís ua opcion tà auer connexion dirècta damb era politica espanhòla e poder infloïr enes decisions politiques der Estat que repercutissen enes nòsti territòris”, higie Boya.

Hònt: Unitat d’Aran