Coma cada estiu es Musèus dera Val d’Aran an organizat tota ua seguida d’activitats entà toti es publics a compdar deth 8 de junhsèga e enquiath 8 de seteme.

Eth deluns 8 de junhsèga eth Musèu dera Val d’Aran encetèc ua nau sason d’ostiu, plia d’activitats diferentes, visites guidades e teatralizades e fòrça talhèrs didactics. Toti es nòsti musèus e glèises tornen a daurir es sues pòrtes entà apropar-vos ara memòria, encara viua, d’un pòble, entà senter-la, descorbir-la e gaudir-la.

Musèus dera Val d’Aran: era pòrta entà conéisher eth territòri

A compdar deth 8 de junhsèga e enquiath 8 de seteme poderatz visitar de deluns a dimenge toti es musèus que formen part der Hilat de Musèus dera Val d’Aran. D’un costat eth Musèu dera Val d’Aran e er Ecomusèu çò de Joanchiquet de Vilamòs, en sòn orari abituau. Ath delà, s’aufrissen guidatges en dus equipaments a on conéisher eth nòstre patrimòni industriau d’ua faiçon entretenguda: era Mòla de Salardú (11, 12 e 13 ores) e era Fabrica dera lan (17,18 e 19 ores). E, non podem desbrembar era Mina Victòria, ua mina de nauta montanha que mos apròpe ara vida vidanta des minèrs que i trebalhèren ena prumèra mitad deth sègle XX. Era Mina daurís cada dia de 11h a 14:30 h e includís tanben servici de guida.

Exposicions temporaus embruishades

Es exposicions hèn part des ostius deth Musèu dera Val d’Aran. Era glèisa de Sant Joan d’Arties acuelh, enquiath 28 de seteme, era exposición “Er art dera harga” de deluns a dissabte e de 17 h a 21 h. Coma nauetat, enguan er Ecomusèu çò de Joanchiquet de Vilamòs se convertirà en larèr des bruishes damb era mòstra «Se’n parlave… e n’hi havie. Era bruisheria enes tèrres de ponent e Pirenèu«, exposicion organizada pera Xarxa de Museus de les terres de Lleida i Aran. Aguesta exposicion serà eth quadre perfècte entà tot un seguit d’activitats relacionades damb aguesta tematica, coma son es visites guidades e teatralizades, talhèrs didactics… e ua setmana fòrça especiau! Deth 15 ath 19 de junhsèga, eth Musèu dera Val d’Aran a premanit, era «Setmana de bruishes«, ua setmana plia d’activitats, talhèrs, conferéncies e projeccions entre d’autes suspreses.

Un ostiu de pellicula

Ena linha des setmanes tematiques, eth mes d’agost acuelherà era «Setmana Verdaguer«. Deth 5 ath 9 d’agost s’organizaran un seguit d’activitats relacionades damb eth libre «Maleïda» de Bernat Gasull, a on se relate era aventura de Jacint Verdaguer enquia arribar en Aneto, en tot passar pera Val d’Aran. Pendent aguesti dies, poderatz gaudir des rotes de senderime per a on passèc Verdaguer, acompanhadi der autor deth libre. Eth punt finau dera setmana serà era estrea deth film «Maleïda.1882» ua produccion de Filmexplora en qué a collaborat tanben eth Musèu dera Val d’Aran.

Pèires damb istòria

Mès, er ostiu des Musèus dera Val d’Aran non s’acabe aciu. Coma cada an non podem desbrembar era istòria des pèires damb qué bastiren es glèises araneses. Aguesta istòria la podem conéisher, a trauès dera Rota Romanica d’Aran. Dubèrta de deluns a dissabte peth maitin de 11h a 14h e pera tarde de 17 a 20 h. Es nòsti guides vos aproparàn as murs, pintures e imatges des glèises de Santa Maria d’Arties, Sant Esteuè de Betren, Sant Fèlix de Bagergue, Sant Pèir d’Escunhau, Santa Maria de Cap d’Aran de Tredòs, Santa Eulària d’Unha e Sant Fèlix de Vilac.

De totes es visites e activitats, podetz consultar es oraris en: http://www.cultura.conselharan.org/content/view/325/232/lang,es/

Info: Musèus dera Val d’Aran