Aguest diuendres, 27 d’octobre, entàs 19.00 ores, ena glèisa de Sant Joan d’Arties s’inaugure era exposicion “Paisatges ena Taula” e se poderà visitar, enquiath 27 de gèr de 2018, de deluns a dissabte de 17 a 20 ores.

Aguesta  exposicion ei frut deth trebalh conjunt des musèus que formen part der Hilat de Musèus d’Etnologia de Catalonha e preten mostrar era evolucion dera gastronomia ath long dera istòria e coma a cambiat eth paisatge dera nòsta taula. Era globalizacion mos a transformat es aliments, n’a aportat de naui e a cambiat eth mode d’elaboracion, conservacion e produccion.

Era museografia dera exposicion se compause de recorsi expositius de tot tipe: interactius, documentaus e objectes etnologics dera vida vidanta enes nòstes codines.

Aguest 2017, coma an dera gastronomia, enes musèus, s’an amiat a tèrme d’autes activitats relacionades damb era tematica, coma eth Dia Internacionau dera Poesia, damb un recitau gastro-poetic titolat “Nhacs Poetics”, uns talhèrs infantils, a on es aliments an estat es protagonistes des creacions des mainatges. Atau madeish, enes visites teatralizades en Joanchiquet era gastronomia prenec part importanta damb ua degustacion finau d’un plat tradicionau aranés, era òlha, en “Joanchiquet tant de gust!”.

Ath delà, “Paisatges ena taula” ei era darrèra exposicion d’enguan ena glèisa de Sant Joan e ua des moltes accions restacades damb era gastronomia en Hilat de Musèus dera Val d’Aran.