Era estudiant aranesa Lourdes Bruna, de dètz-e-sèt ans, a demanat hèr es pròves des PAU en aranés pr’amor qu’ei lengua oficiau en Catalonha, e pr’amor que cre qu’ei eth sòn dret. Aguest serà eth prumèr còp ena istòria qu’un estudiant realize es pròves d’accès ara universitat en aguesta lengua, en tot arrespóner as qüestions en aranés.

Lourdes prenec aguesta decision quan hec eth trabalh de recèrca (TDR) en aranés e vedec qu’ère capaç de hèr es pròves en aguesta lengua.

En convèrsa damb Aran Nau Digitau, Lourdes Bruna, estudiant dera Val d’Aran, qu’a corsat eth bachillerat francés, a explicat que s’examinarà, entà pujar nòta, des matèries optatives de matematiques e fisica en aranés, ua situacion excepcionau que li servirà entà reivindicar eth dret de hèr es PAU ena sua lengua, encara que non sap se li corregiràn es pròves.

Lourdes Bruna qu’a corsat eth bachillerat francés s’examinarà, entà pujar nòta, des matèries optatives de matematiques e fisica en aranés

En aguest sens, er institut de Lourdes a enviat ua carta en tot explicar eth cas e eth sindic d’Aran, Carlos Barrera, a aufrit dus lingüistes entà ajudar a arrevirar es responses e que se poguen corregir es examens. Era Universitat de Lhèida pera sua part estúdie s’es examens se corregiràn ena madeisha universitat o peth contrari acceptaràn era aufèrta deth sindic d’Aran.

Eth darrèr mes de març eth Conselh Generau d’Aran tornèc a demanar sense èxit qu’es enunciats des pròves d’accès ara universitat siguessen tanben en aranés.