Eth plen der Ajuntament de Naut Aran a aprovat aué era mocion deth grup municipau d’Unitat d’Aran entà prebotjar es servicis d’atencion ara gent grana en aguest municipi

Eth còsso pòrtaveu deth grop municipau, Paco Bruna, s’a mostrat fòrça satisfèt qu’aué eth plen der Ajuntament age aprovat era mocion d’Unitat d’Aran, entà bastir un equipament entà acuélher ara gent grana tamb besonhs assitenciaus deth municipi. Bruna a declarat que “tà nosati aguest ahèr ei plan important. Ja formaue part deth nòste programa electorau coma un punt prioritari. Enquia ara s’an priorizat d’auti ahèrs e servicis, tanben importants enes nòsti pòbles, coma son es sales sociaus, es instalacions educatives, es parcatges, eca. Mès era atencion ara nòsta gent grana a d’èster ara ua prioritat”.

En municipi i demoren 156 persones majors de 70 ans, que representen un 8% deth totau dera poblacion. “Malerosament, auem sèt vesins en residéncies dehòra d’Aran, e cinc d’eri son deth nòste municipi. Ath delà, era listra de demorar tà accedir ara residéncia Sant Antòni de Vielha ei d’ath torn de 30 persones”, a manifestat Francés Bruna. Eth còsso pòrtaveu a quedat ara disposicion der equip de govèrn tà trabalhar en aguest ahèr, e a arregraït era sua volentat de trabalh.

Un còp debatuda era mocion, eth plen a aprovat per unanimitat era prepausa.

Hònt: Unitat d’Aran