Eth Departament de Cultura estree un nau canau de Twitter en aranés, er occitan d’Aran, damb eth perfil @occitan_aranes, qu’entre aué en foncionament.

Eth perfil, gerit pera Direccion Generau dera Politica Lingüistica, difonerà mès que mès es notícies d’interès entara comunitat aranesa, e occitana en generau: efemerids, recorsi lingüistics, subvencions, prèmis, eca. Enguan, en perfil d’@occitan_aranes qu’aurà un resson especiau era informacion sus era commemoracion deth 10au anniversari dera mòrt de Robèrt Lafont: activitats culturaus, academiques e de divulgacion que se realizen entà hèr a conéisher era vida e era òbra d’aqueth escrivan, lingüista, istorian, activista e òme politic, figura màger der occitanisme deth sègle XX.

Era dubertura d’aguest nau canau de comunicacion en Twitter qu’arribe en encastre der Acòrd deth Govèrn dera Generalitat prenut entà refortir er usatge der aranés enes webs institucionaus, coma opcion lingüistica visibla e accessibla, e entà publicar-i es contenguts des canaus d’informacion e comunicacion enes diferenti hilats sociaus pròpris. Parallèlament, era pagina d’occitan deth web de Lengua Catalana que contunhe d’aufrir, coma enquia ara, es notícies restacades damb er aranés.

Er aranés, oficiau en Catalonha
Er occitan qu’ei lengua oficiau en Catalonha segons er Estatut de 2006, ua oficialitat regulada ena Lei 35/2010, de 1r d’octobre, der occitan, aranés en Aran. Entre es foncions dera Direccion Generau dera Politica Lingüistica que i a eth foment der usatge, era difusion e era coneishença dera lengua occitana, nomentada aranés en Aran, e promòir es relacions exteriores damb es territòris deth domeni lingüistic occitan en encastre dera lengua e des productes culturaus que s’i exprimissen, en collaboracion damb eth Conselh Generau d’Aran. Que sosten tanben er Institut d’Estudis Aranesi e que i coopère, coma autoritat lingüistica der aranés en Catalonha.

Aguest compde se some as perfils de Twitter que gerís era Direccion Generau dera Politica Lingüistica e as des organismes adscriti, Consòrci entara Normalizacion Lingüistica e TERMCAT, Centre de Terminologia. Destaquen peth nombre de seguidors eth compde de @llenguacatalana (damb mès de 30.000 seguidors) e eth d’@optimotcat (guaireben damb 32.000). Damb es perfils de @cat_cine@vxlcat@termcat e @cpnlcat somen mès de 100.000 seguidors enes hilats sociaus.

Info: Departament de Cultura Generalitat de Catalonha