Eth sindic d’Aran, Carlos Barrera, e eth president dera Acadèmia aranesa dera lengua occitana (AALO), Jusèp Loís Sans, an signat un convèni entà garantir eth foncionament dera AALO. Er acte a compdat tanben damb era preséncia dera conselhèra de Torisme e Desvolopament Economic d’Aran, Anna Díaz e des membres dera AALO: Rosa Ma Salgueiro e Jèp de Montoya.

Damb aguest convèni, eth Conselh Generau d’Aran se compromet a realizar es següentes accions:

1. Dar ajuda entath foncionament ordinari dera AALO.

2. Collaborar damb era AALO.

3. Collaborar damb era AALO ena elaboracion d’un Diccionari de Concèptes damb era facilitacion des servicis de reprografia deth Conselh Generau entad aguest ahèr.

Pera sua part, era Acadèmia aranesa dera lengua occitana (AALO) se compromet a realizar es accions següentes:

1. Continuar damb eth procés entath compliment dera sua foncion d’autoritat lingüistica dera varietat aranesa dera lengua occitana e d’aconselhadora sus eth tronc comun e estructurar era sua institucion entath compliment des punts prumèr e dusau des antecedents d’aguest convèni.

2. Aconselhar ath Conselh Generau d’Aran en matèria de referéncia lingüistica der occitan e dera varietat aranesa tostemp que sigue requerit.

3. Contunhar era elaboracion d’un diccionari de concèptes dera varietat aranesa, en tot dar era maxima participacion possibla.
4. Destinar era aportacion economica deth Conselh Generau d’Aran a despenes diuèrses de foncionament e pròpries dera organizacion dera institucion.

Eth Conselh Generau d’Aran aportarà ara Acadèmia aranesa dera lengua occitana era quantitat maxima de 22.000 € deth pressupòst generau vigent entar exercici 2018.

En paraules deth sindic d’Aran, Carlos Barrera: “Era Acadèmia Aranesa dera Lengua Occitana ei era autoritat encargada d’establir e actualizar era normativa lingüistica der aranés e des deth Govèrn pensam qu’ei fonamentau dar supòrt ara Acadèmia pera pervivéncia dera nòsta lengua, er aranés”.

Pera sua part, eth president dera Acadèmia aranesa dera lengua occitana (AALO), Jusèp Loís Sans, a manifestat: “Eth Conselh Generau d’Aran tostemp a dat supòrt ath trebalh dera Acadèmia. Actuauments, entre d’autes accions, estam trebalhant ena publicacion deth vocabulari dera nhèu (espòrts d’iuèrn) e en diccionari que gesserà en 2019 damb mès de 10.000 entrades”.

Info: Conselh Generau d’Aran