Eth Conselh Generau d’Aran en collaboracion damb era Associacion Culturau DiversiaWorld, impulsarà un nau portau d’internet de autoaprendissatge der aranés. http://www.aranes.club/

En an 2016 era Associacion Culturau DiversiaWorld, comencèc ua plataforma d’e-learning o aprendissatge en linha e divulgacion der occitan-aranés damb era fin d’aufrir un espaci entà apréner er aranés online, en tot aufrir un espaci d’aprendissatge interactiu, facil e complèt, que permete apréner ath ritme de cadun, a trauès d’unitats teoriques, unitats de renfortiment, unitats de sintèsis e de de autes d’expression orau e d’expression escrita, completades damb exercicis interactius e exercicis de renfortiment, tostemp damb er acompanhament personalizat e eth seguiment de tutors.

Actuauments s’aufrís online eth Nivèu A1 e A2, que correspon ath Nivèu A1 oficiau deth Conselh Generau d’Aran.

Er acòrd de collaboracion damb eth Conselh Generau d’Aran, permeterà implementar en aguest nau portau es corsi de Nivèu B1 e B2.

Es alumnes que corsen aguestes formacions der aranés obtieràn un certificat que les harà possible accedir as examens presenciaus entà obtier es titolacions oficiaus deth Conselh Generau d’Aran.

Ua des novetats importantes ei qu’es examinadors deth Conselh Generau d’Aran, se desplaçaràn dehòra dera Val d’Aran e de Barcelona entà que es alumnes poguen hèr es examens presenciaus enes sòns lòcs de residéncia.

Per d’auta part, es mès petiti e es non tant, tanben gaudiràn dera version interactiva deth conde Petit Princep, damb ua seria de materiau addicionau coma es conjugacions des vèrbs o era prononciacion des mots.

Mès informacion:  http://www.aranes.club/

Info: Conselh Generau d’Aran