Era Marxa Beret organizada peth Conselh Generau d’Aran, Ajuntament de Naut Aran e Baqueira Beret se disputarà es dies 6 e 7 de hereuèr de 2016.
Era presentacion oficiau dera edicion 2016 qu’a agut lòc en CGA, a anat a cargue deth director dera Marxa Beret e vicesindic d’Aran Luís Carlos Medina, acompanhat deth baile de Naut Aran Cesar Ruíz Canela, Paco Cerdá en representacion dera Deputacion de Lhèida e deth coordinador dera organizacion dera Marxa Beret Manu Caseny.
“Damb era celebracion deth Campionat d’Euròpa de Maratons d’Esquí Nordic, era Marxa Beret s’assolide coma ua des mès importantes competicions d’esquí de hons d’Euròpa”, expliquèc Luís Carlos Medina e, “supause era internacionalizacion dera pròva, qu’en aguesta 37au edicion acuelherà participaires de mès de 15 païsi que destaquen entre esquiaires de Norvègia, Finlàndia, Suècia, Alemanha, Belgica, Àustria, Chèquia, Letònia, Lituània, Soïssa, França e per supausadi corredors espanhòus, andorrans, catalans e aranesi, çò que hè qu’era prevision d’esquiaires sigue entre 1.300 e 1.400 concurrents “ahigec.
Era Marxa Beret, qu’enguan arribe ara 37au edicion, date der an 1977. Era edicion 2016 ei includida laguens deth calendari FIS (Federacion Internacionau d’Esquí), laguens deth Circuit Euroloppet (Circuit Europèu de marches de longa distància), pròva puntuabla entara Copa Catalana, e Campionat d’Euròpa de Maratons d’Esquí Nordic.
Entà organizar era 37au edicion dera Marxa Beret, s’an mercat de forma definitiva, es circuits de 15Km e 30Km entara competicion deth dissabte dia 6 de hereuèr e es circuits de 10Km, 21Km e 42km entara competicion deth dimenge dia 7 de hereuèr.
Eth Campionat d’Euròpa de Maratons d’Esquí, ac guanharà er esquiaire qu’artenhe es melhors tempsi enes pròves de Patinador 30Km deth dissabte 6, e de 42km Classic deth dimenge 7 de hereuèr.
Es organizadors dera Marxa Beret 2016 compden damb era collaboracion d’un collectiu uman de mès de 230 persones integrades pes Volentaris d’Aran, atau coma Mossos d’Esquadra, Pompièrs d’Aran e SABS (Servici Aranés de Benestar e Salut), entà assegurar eth corrècte desvolopament dera pròva que cada an melhore eth sòn nivèu organizatiu.
Pera sua part Torisme Val d’Aran, a métut en foncionament en coordinacion damb es organizadors, un servici d’informacion entàs participaires dera 37au Marxa Beret, qu’en fòrça des casi arriben ena Val d’Aran e ara estacion de Baqueira Beret acompanhadi des sòns familhaus, entà que agen accès e informacion sus lotjaments, establiments de restauracion e deth rèste de servicis pendent eth sòn sojorn.
Era Marxa Beret qu’enguan a un pressupòst d’uns 120.000 €, compdarà tanben damb ua naua edicion dera hèira de materiau esportiu “Esport Nhèu” e ua exposicion sus era istòria des desparières edicions dera Marxa Beret, que se poderà visitar des deth dia 30 de deseme en Musèu dera Nhèu, d’Unha.
Es inscripcions entà participar ena 37au Marxa Beret, se pòden ramplir enquiath dia 2 de hereuèr de 2016 per internet a trauès dera plana web dera Marxa www.marxaberet.com, e es dies 5 e 6 de hereuèr en Salardú.

Era 37au edicion dera Marxa Beret, se presentarà tanben ena Deputacion de Lhèida pendent eth mes de gèr.