Coma ja auancèc Aran Nau, eth plen der Ajuntament de Vielha e Mijaran a aprovat en session extraordinària era 2au modificacion deth pressupòst d’enguan per valor d’1.711.987,63€. Era bona situacion economica actuau deth consistòri, en que s’a eliminat eth deute, permet que pendent aguest an se destine 985.000€ a Inversions entath municipi.

Es principaus accions que s’amiaràn a tèrme en aguest airau son principaument er apariament e manteniment de diuèrsi carrèrs de Vielha: Conservacion deth parcatge dera Plaça dera Generalitat de Catalonha, ena confluéncia entre es arrius Nere e Garona, era melhora deth hilat de clavegueram e aigua potabla en Carrèr Bergàs e era substitucion deth hilat d’aigua e apariament des pas de pedons en Carrèr Montcorbison. Aguestes tres accions, catalogades coma financerament sostenibles, supausen lèu 300.000€, e provien deth superavit der an 2017, avalorat en 1.354.634,64€. Aguesta inversion ei possibla gràcies ath decrèt qu’enguan a aprovat eth govèrn espanhòl que permet as ajuntaments reinvertir eth sòn superavit de manèra immediata.

Atau madeish, d’autes accions que s’amiaràn a tèrme son eth bastiment deth centre de joenessa en antic aucidèr, era reforma dera sala polivalenta, e eth bastiment d’ua pista poliesportiva exteriora e deth skate park ath cant deth Palai d’Espòrts. Ath delà, se crearà ua zona de picnic en Prat de Teixineret (Cap dera Vila) e s’apariaràn es cloradors des dipòsits d’aigua.

Per un aute costat, e a conseqüéncia des condicions climatologiques d’aguest darrèr iuèrn, s’a ampliat ua partida, apruprètz de 150.000€, destinada ath manteniment des carrèrs e ara reforma des accèssi as diuèrses pedanies municipaus, que s’executaràn de manèra immediata aguesta primauera.

En plen extraordinari deth consistòri s’a aprovat era 2au modificacion deth pressupòst per valor d’1.711.987,63€, e, ath delà, s’a confirmat un superavit d’1.354.634,64€ der exercici de 2017

Segontes eth baile de Vielha e Mijaran, Juan Antonio Serrano: “Èm contents d’auer podut amiar endeuant aguesta modificacion deth pressupòst, sustot perqué era quantitat que destinam enguan a inversions supause eth 60% d’aguesta modificacion. Dempús de fòrça ans economicament complicadi entath consistòri, ara compdam damb un ajuntament sanejat e poderam realizar desparières òbres de govèrn enes pròplèus mesi”.

Aguesta 2au modificacion deth pressupòst s’a aprovat damb es vòts a favor deth govèrn municipau d’Unitat d’Aran e tanben deth grop de Ciutadans, mentre que Convergéncia Democratica Aranesa s’a abstengut.

Hont: Ajuntament de Vielha e Mijaran