Enguan era chifra artenhuda ei de 1682,10€ qu’anaràn destinadi as colònies tà mainatges e mainades damb cancer qu’era AECC organize cada an ena Val d’Aran, e qu’enguan auràn lòc deth 14 ath 21 de junhsèga.

Representants dera Junta Locau d’Aran dera AECC, dera Escòla Tschaikowsky e deth madeish consistòri, s’an amassat en Ajuntament de Vielha e Mijaran entà formalizar era entrèga des 1.682,10€ requectadi pendent era edicion d’enguan deth teatre musicau. Ua chifra recòrd enes diuèrsi ans que s’a celebrat aguest espectacle enquiara.

Ua quarantea de persones, adults e mainatges, an participat n’aguesta quatau edicion de teatre musicau.

Aguesti sòs seran destinadi as colònies qu’era AECC organize des de hè 20 ans en Aran entà mainatges e mainades qu’an patit o patissen càncer. Enguan aguestes colònies s’amiaràn a tèrme deth 14 ath 21 de junhsèga en Salardú. Er objectiu d’aguesti campaments d’ostiu ei eth de normalizar era situacion d’aguesti joeni en tot realizar activitats de léser, conéisher a d’auti joeni ena madeisha situacion e compartir experiéncies e viuences restacades damb era malautia que les resulte dificil de compartir damb d’auti.

Èm fòrça satisfèti d’aufrir mès sòs qu’es ans anteriors deth teatre musicau a ua causa fòrça importanta coma ei era collaboracion damb es colònies d’ostiu ena Val d’Aran dera AECC damb es mainatges e mainades que patissen cancer”, comente era còsso d’Accion Sociau e Ciutadania, Maria Vergés. E hig que ”voi arregraïr en nòm der Ajuntament a toti es qu’an hèt possible qu’un an mès eth teatre musicau age estat un exit, e qu’es usatgèrs des colònies se’n veiguen beneficiadi”.

Info: Ajuntament de Vielha e Mijaran