Aguesta dimenjada, es pòbles d’Aubèrt e Betren celèbren es sues Hèstes Majors, darrères der an en celebrar-se ena Val d’Aran, en aunor ara Mair de Diu deth Ròser.

Pendent es dies 5, 6 e 7 d’octobre, Betren celebre era sua Hèsta Major damb ua Bandoida de campanes entà anunciar eth començament dera hèsta tàs 17:30 ores deth diuendres. Pera net, gran Loto-Quinto e session de balh damb era orquestra Tatuaje.

Eth dissabte peth maitin concurs de diboish entàs més petiti e aperitiu entath pòble. Pera tarde, Campionat de botifarra ena sala, jòcs e actuacion infantil, còncurs de coquilhons e competicion de talh de tronc. Pera net, session de balh e de Dj. Londeman, dimenge 7 d’octobre, charanga, processon peth pòble seguida de missa en aunor ara Mair de Diu deth Ròser damb balhs aranesi damb Es Fradins de Vielha. Pera tarde, partit de pilòta e session de balh.

En Aubèrt, era Hèsta Major començarà eth dissabte 6 enquiàth deluns 8 d’octobre, damb jòcs infantils e còca e vin cau entà toti. Pera net, session de balh e Dj. Eth dimenge, a compdar des 12:30 ores, procession des d’era “Misea, Capèla deth Rosèr” enquiara Glèisa de Sant Martin e santa missa en aunor ara Mair de Diu deth Rosèr e dempús vermuth aufrit pera E.M.D. d’Aubèrt. Pera tarde susprèsa entàs mès petiti, concors de pastissi e balh, e pera net, sopar popular e balh.

Eth deluns 8 d’octobre, santa missa en aunor a Sant Ròc.