Eth pròplèu 25 de noveme se celèbren 16 ans dera inauguracion dera Bibliotèca Generau de Vielha, gerida per Ajuntament de Vielha e Mijaran e que compde damb eth supòrt deth Conselh Generatz d’Aran.

Entà celebrar er anniversari s’an organizat activitats culturaus deth 20 ath 25 de noveme entre es que destacam era projeccion de pellicules laguens dera mòstra de Cinèma en Occitan, conda-condes e talhèrs de poesia creatiua entre uns auti.

Entre era programacion cau destacar eth dusau concors de micro relats e eth prumèr concors de fotografia de repopets que se realize enquiath 20 de noveme. Eth liurament de prèmis d’aguesti concorsi debanarà eth dia 24 coma un acte laguens dera programacion der anniversari dera Bibliotèca.

Entà Maria Vergés, còsso de cultura d’Ajuntament de Vielha e Mijaran: “era Bibliotèca Generau de Vielha amie a tèrme un gran trabalh damb eth principau objectiu d’apropar era cultura en forma d’activitats atractiues e actuaus”. Ath delà Vergés soslinhe que “damb aguesti concorsi volem fomentar era creativitat e, sustot, er usatge der aranés entre era poblacion en tot profitar es naues tecnologies” .

Hònt: Ajuntament de Vielha e Mijaran