Luís Carlos Medina Modroño, enquia ager vicesindic prumèr e conselhèr de Joenessa e Espòrts deth Conselh Generau d’Aran, a oficializat era sua renóncia per motius personaus e professionaus as cargues dera maximala institucion aranesa, en transcors d’un plen extraordinari.

Luís Carlos Medina expliquèc qu’aguesta ei ua decision fòrça meditada e dificila, que pren per motius personaus. Medina a volut arregraïr a toti es companhs de govèrn e ath rèste de conselhèrs deth Conselh Generau d’Aran eth sòn acompanhament e collaboracion enes dus mandats en qu’a estat vicesindic d’Aran.

Francés Boya pòrtavotz d’UA-PSC, a arregraït es ans dedicadi per Medina ath Conselh Generau d’Aran e eth sòn talant dialogant ara ora de hèr politica en un país petit coma Aran.

José Antonio Bruna deth PRAG, a arregraït tanben era implicacion e era dedicacion der enquia ager vicesindic d’Aran.

Pera sua part, eth sindic d’Aran, Carlos Barrera, soslinhèc que deuant tot s’a de respectar as persones e es sues decisions e en aguest sens, des de CDA, respècten aguesta decision peth dessús de quinsevolh auta circonstància que sigue. Barrera, destaquèc eth talent e era dedicacion pendent sèt ans e miei de Luís Carlos Medina as sòns cargues en Conselh Generau d’Aran. Eth sindic d’Aran, s’a mostrat pleaments convençut qu’aguesta decision se tracte sonque d’un parentèsi motivat pes circonstàncies personaus e qu’en un futur Luís Carlos Medina tornarà ara vida politica activa e de gestion, que harà qu’eth país recupère ua persona conscienta de quin ei eth present e futur dera Val d’Aran.

Ath finalizar eth plen, eth sindic d’Aran, Carlos Barrera, a anonciat qu’era actuau presidenta dera EMD de Garòs, María Angels Ordax, serà era naua conselhèra d’Administracion Publica e Finances e Transparéncia deth Conselh Generau d’Aran, e César Ruiz Canela aucuparà eth cargue de vicesindic prumèr.

Info: Conselh Generau d’Aran

Esta noticia está disponible en: esEspañol