Eth plen der Ajuntament de Vielha e Mijaran a aprovat inicaument ena session extraordinària d’aguest dimèrcles, era Ordenança Municipau reguladora des condicions de localizacion des activitats recreatives musicaus de naua creacion. D’aguesta manèra, es naui locaus musicaus nocturns s’auran de plaçar dehòra des zònes residenciaus, en tot auer de hè’c en parçan de Mijaran, qu’ei er unic lòc abilitat actuaument.


Eth plen tanben a debatut sus era regulacion des abitatges d’usatge toristic en tot non aprovar-se era prepausa de modificacion dera norma que se prepausaue e postposar-se era sua aprobacion tà cercar eth consens entre es grups municipaus

Per un aute costat, eth plen der Ajuntament de Vielha e Mijaran a debatut era modificacion des Normes Subsidiàries referentes as abitatges d’us toristic deth municipi, entà trapar ua solucion a ua problematica que hè fòrça ans qu’existís en municipi, e a on ara madeish i a ua moratòria ara concession de licéncies que finalize en seteme. Fin finau, era prepausa non a compdat damb era majoria sufisenta e era negociacion s’a ajornat a posteriors amassades entre es grops politics der Ajuntament.

Entath baile de Vielha e Mijaran, Juan Antonio Serrano, “eth nòste municipi, e Aran en generau, a actuaument un grèu problèma d’abitatge que, jos eth nòste punt de vista, era gestion des loguèrs toristics agrèuge” e higie que “aguesta prepausa de modificacion des normes pretenie sajar de solucionar de bèra forma aguesta problematica, tà facilitar er accès ara viuenda de joeni e trabalhadors atau coma possar eth desvolopament socioeconomic dera rèsta de pòbles deth municipi”.

En aguest sens, eth baile a confirmat que se contunharà trabalhant en aguest ahèr entà arténher ua solucion.

Info: Ajuntament de Vielha e Mijaran

Esta noticia está disponible en: esEspañol