Era Val d’Aran contunhe en tot èster referent entà esportistes e equipes de naut nivèu qu’escuelhen eth Pirenèu entara preparacion dera sason o entà celebrar-i pròves esportiues, tau coma demòstren es donades deth mes de junhsèga de 2018, segontes a confirmat Foment Torisme Val d’Aran.

Eth passat 24 de junhsèga era Val d’Aran acuelhec eth pas dera 16au etapa deth Tour de França 2018 en tot entrar per Pontaut, ena termièra aranesa damb França e en tot gésser peth Còth deth Portilhon en direccion entà Bagnères de Luchon damb un recorregut de 18 quilomètres per tèrres araneses que tanben includic es poblacions de Les e Bossòst. Era etapa deth Tour ena Val d’Aran auec un gran impacte tant per çò qu’ei era aucupacion otelèra coma economicaments. Hònts de Foment Torisme Val d’Aran an confirmat que s’aucupèc 80% des 8.000 lhets disponibles aqueth dia en tota era Val d’Aran, çò que correspon a un impacte economic d’apuprètz 480.000 € en 24 ores.

Eth sindic d’Aran, Carlos Barrera, a avalorat fòrça positivaments era fidelitat deth Tour de França damb era Val d’Aran donques a dit que represente un benefici fòrça important entath sector ostalèr e de restauracion d’Aran, e promò eth nòste país coma destin de cicloturisme ath long deth mon, donques ei eth tresau eveniment esportiu internacionau mès seguit dempús des Jòcs Olimpics e deth Mondiau de fotbòl.

Pendent eth mes de junhsèga era Val d’Aran a acuelhut tanben d’autes pròves esportiues de prumèr nivèu coma son era dusau edicion dera Trail Vielha-Molières 3010 que compdèc damb 1.200 participaires; ua naua edicion dera Pedals de Foc Non Stop 2018 Campionat d’Euròpa MTB Ultramarathon damb 1.000 participaires inscriti; era 4au edicion d‘Era Roda Non Stop ena que i participèren 200 esportistes; e era pròva de cicloturisme Campilaro 2018 que passèc per tèrres araneses damb 200 participaires.

Era etapa deth Tour de França amassa damb era rèsta de pròves esportiues celebrades eth mes de junhsèga ena Val d’Aran generèren un impacte economic de retorn numerotat per Foment Torisme Val d’Aran en 1.180.000 €.

Era conselhèra de Torisme d’Aran, Anna Díaz, a explicat que cau avalorar fòrça positivaments er esfòrç hèt des deth Conselh Generau d’Aran es darrèri ans, qu’es mielhors equipes esportius e es mielhors competicions non vierien sense eth ara Val d’Aran. Entà Anna Díaz non sonque cau hèr mencion ath impacte economic que totes aguestes activitats genèren, mès que çò que cau destacar ei que Aran aufrís es mielhors condicions tant a equipes coma esportistes. Díaz metec tanben en valor era implicacion des empresaris e collectius aranesi qu’impulsen fòrça d’aguesti eveniments atau coma era collaboracion des Volontaris dera Val d’Aran ena organizacion des pròves.

 

Soslinhar qu’eth Conselh Generau d’Aran e Foment Torisme Val d’Aran an destinat ua inversion totau de 20.500€ as aportacions entara organizacion des diferentes pròves esportiues celebrades ena Vau d’Aran en junhsèga damb eth resultat economic abantes mencionat.

Cau destacar era preséncia un ostiu mès, e ja ne son 5 de consecutius, des plantilhes deth RCD Espanyol B e dera equipa femenina ena Val d’Aran entà realizar er stage de pretemporada. Ambdues equipes an utilizat eth camp de fotbòl de Garòs en Naut Aran que cada an realize melhores enes sues installacions pr’amor qu’aguestes equipes de prumèr nivèu gaudisquen des mielhors condicions entàs sessions de maitin e tarde des sòns entrenaments. Eth RCD Espanyol B jogarà ara dusau division B, dempús der ascens artenhut era sason passada, mentre era equipa femenina ‘perica’ ac harà ena prumèra division.

 

Era ACB torne ara Val d’Aran

Era Val d’Aran tornarà a acuélher enguan equipes dera Liga ACB pendent era pretemporada, damb er stage deth Baskonia Basket e Estudiantes a finaus deth mes d’agost. Era equipa madrilenca d’Estudiantes serà eth prumèr en visitar Aran, a on i serà deth 20 ara 24 d’agost entà premanir era sason. Eth Baskonia prenerà eth relèu e harà er stage de preparacion ena Val d’Aran deth 24 ath 30. Cau arrebrembar qu’eth Baskonia Basket tornarà a hèr concurréncia ena Eurolliga, a on n’a jogat 6 viategs era Finau Four.

En aguest sentit era conselhèra de Torisme d’Aran, Anna Díaz, a destacat qu’eth Conselh Generau d’Aran assumís tota era despensa dera preséncia d’aguestes equipes dera Liga ACB ena Val d’Aran e a volut arregraïr era continuitat dera collaboracion damb era equipa de Team Sports Management, qu’ath delà des equipes de basquet, tanben gerís es activitats deth RCD Espanyol e deth Lhèida Esportiu. Anna Díaz a explicat que Torisme Val d’Aran harà campanhes de promocion dera destinacion toristica Val d’Aran enes estadis e pabalhons d’aguesti clubs esportius donques aguestes accions ajuden a fidelizar mercats coma eth madrilenc e deth País Basc.

Info y fotos: Conselh Generau d’Aran

Esta noticia está disponible en: esEspañol