Deman, dimèrcles entàs 7:00, ” El matí de Catalunya Ràdio”, damb Mònica Terribas e, dempús, “Eth maitin d’Aran” en desconnexion entara Val d’Aran, estrearàn ua naua cançon deth disc de La Marató, que gesserà ara venda eth 2 de deseme enes diaris der encastre catalan.
Se i poderà escotar tota ua suspresa musicau perque per prumèr viatge se versione un tèma en aranés. Serà eth “Viatge a Ítaca”, de Lluís Llach, tot un monument musicau que se transforme ena veu d’Alidé Sans acompanhada peth còr occitan Lo Barrut en “Viatge entà Ítaca”.
Eth dimenge 16 de deseme, era 27au edicion de La Marató de TV3 e Catalunya Ràdio destinarà eth sòn esfòrç divolgatiu e impulsor dera recerca biomedica ath càncer, era prumèra causa de mòrt entre es òmes e era dusau entre es hemnes.

Ua malautia ei un viatge, e en cas deth càncer pòt èster fòrça long. Era cançon de Lluís Llach parle de dar-li era importància que mereish aguest viatge. De acceptar es trebucs com ua part mès dera vida, d’agarrar fòrça e èster valent entà tirar endauant eth temps que dure. Non se pòt arturar era vida e deishar-se anar pendent eth procès.

“Viatge entà Ítaca” ei un monument musicau que pògui artistes gosarien de versionar. Alidé Sans e Lo Barrut non sonque ac an hèt senon que ath delà la reinterprèten en aranés

“Viatge entà Ítaca” ei un monument musicau que pògui artistes gosarien de versionar. Alidé Sans e Lo Barrut non sonque ac an hèt senon que ath delà la reinterprèten en aranés. Ua delícia gràcies ara joena cantaira Alidé Sans, autora de tota ua revelacion musicau deth disc “Henerècla” damb Paulin Courtial. E tanben gràcies ath còr occitan Lo Barrut, un còr de veus joenes que da naua vida as polifonies e musiques tradicionaus occitanes.

“El matí de Catalunya Ràdio” s’emet de deluns a diuendres, de sies deth maitin enquia era ua deth meddia.

Info: CCMA

Esta noticia está disponible en: esEspañol