Eth secretari d’Infrastructures e Mobilitat, Isidre Gavín, e eth sindic d’Aran, Carlos Barrera, an visitat er elipòrt dera Val d’Aran a on eth Departament de Territòri e Sostenibilitat, a trauès d’Aeropòrts de Catalonha, e eth Conselh Generau d’Aran an finalizat es òbres d’adeqüacion entà que aguesta installacion pogue operar es 24 ores.

Gràcies ar acòrd entre ambdues institucions s’a melhorat e ampliat er elipòrt damb er objectiu de convertí’c en ua infrastructura de referéncia. Es trabalhs de melhora des installacions, ath delà dera operativitat H24, consistiràn ena reforma des espacis interiors der actuau angar entà que se convertisque en zòna de servicis e sala de gestion d’emergéncies e eth bastiment d’un angar e ua plataforma de parcatge en un terren adjacent.

Er elipòrt dera Val d’Aran acuelhie enquia ara operacions deth Servici d’Emergéncies Medicaus, rescats de montanha, avitualhament e traslat de residus de refugis de montanha, atau coma trabalhs aeriani en nauta montanha e vòls toristics d’eliesquí des dera gessuda deth solei enquiath cogant. Damb es naues accions realizades s’a melhorat era sua capacitat entà dar contunhitat ad aguestes operacions e acuélher d’autes naues en orari nocturn. Era operativitat H24 permeterà realizar vòls nocturni deth Servici d’Emergéncies Medicaus e traslats espitalaris, alongar es oraris en cas de rescats de montanha o acuélher d’auti servicis especiaus. A compdar d’ara, es operadors interessadi auràn d’adaptar era sua documentacion entà poder includir operacions de net.

Pera sua part, eth sindic d’Aran, Carlos Barrera, a soslinhat que damb era operativitat H24 er elipòrt dera Val d’Aran se convertís en un equipament de prumèr nivèu que melhore fòrça era responsa en cas d’emergéncies sanitàries, mès tanben amplie es possibilitats d’activitat d’aguesta installacion aranesa de forma illimitada. Barrera, expliquèc qu’eth següent pas serà eth bastiment deth nau angar damb capacitat entà tres elicoptèrs e ua naua plataforma de parcatge que didec demora que siguen bastidi e en foncionament a inicis d’estiu der an 2019.

Eth departament de Territòri e Sostenibilitat a invertit 52.500 èuros ena realizacion dera substitucion e calibracion de balises; abalisament e eliminacion d’obstacles, coma per exemple er andàs perimetrau; eliminacion dera senhalizacion orizontau que podie supausar confusion en elipòrt; e delimitacion dera zòna aeronautica.

Pera sua part, eth Conselh Generau d’Aran, a invertit 82.000 èuros enes trabalhs de desbròç e ampliament perimetrau der elipòrt, era adeqüacion deth camin d’accès as installacions e er aquesiment deth terren adjacent ar elipòrt.

Pendent era visita, Gavín e Barrera an avalorat era importància qu’a entara Val d’Aran qu’eth touroperador suedés Quality Travel, qu’opère per dusau an en aeropòrt de Lhèida-Alguaire, aufritz entad aguesta sason d’iuèrn paquets toristics en Aran. Era prevision ei qu’opère pendent ueit setmanes (deth 3 de hereuèr ath 24 de març), damb dus vòls es dimenges previsti as 13 ores. Es toristes qu’arribaràn ena Val d’Aran provieràn de sèt ciutats: Estocolm, Malmö, Kalmar, Gotemburg, Linköping, Vaxjo e Jönköping.

Gavín, a detalhat qu’es toristes qu’arribaràn ara Val d’Aran son clients amants der esquí qu’aprècien ua destinacion de qualitat tant a nivèu de pistes coma otelèr. Aguesta sason aufrissen 1.000 nets, çò qu’equivau a 200 paquets d’ua setmana.

Info: Conselh Generau d’Aran

Esta noticia está disponible en: esEspañol