Tornen un an mès, es Hèstes Majors de Vielha. Enguan, maugrat qu’era hèsta se celèbre deth 7 ar 11 de seteme, es dies 5 e 6 ja començaram a auer es prumères activitats. En totau, 7 dies damb activitats entà tot tipe de publics.

Enguan, ua des nauetats mès importantes, ei era programacion de balh de tarde entàs dies 8 e 10 de seteme ena Sala de Hèstes. Eth dia 9 tanben i aurà balh de tarde ena Plaça dera Glèisa, en tot completar tres dies consecutius.

Coma ja ei abituau, eth dia 7 de seteme aurà lòc era benvenguda as Reines e Dames d’Aunor dera Hèsta, e era Net de Penhes ena Sala de Hèstes. Enguan, 10au edicion, organizada pera penha “Dreti qu’èm cueti”. Eth dia 8 aurà lòc era tradicionau processon enquiath Santuari dera Mair de Diu de Mijaran damb era celebracion dera missa solemna e, ara seguida, balhs aranesi damb era Còlha de Santa Maria de Mijaran e Es Fradins de Vielha.

Eth dia 9 de seteme, ei eth dia dera Net Tematica. Enguan, aguesta celebracion amiarà per títol “Mitologia e legendes”. Per tant, animam a toti a participar d’aguesta activitat, en tot disfressar-se entàs sessions de balh de tarde e dera net.

Eth dia 10 de seteme aurà lòc era tradicionau Baishada deth Cap dera Vila, damb musica aufrida pera charanga, en tot poder gaudir de moscatelh, anís e còca que mos aufrirà era Comission de Hèstes. Un viatge finalizada era baishada, se celebrarà eth dinar popular ena Plaça dera Glèisa.

Er 11, darrèr dia dera Hèsta, i aurà fòrça mès activitats coma eth Castèth de Caishes o cinèma infantil gratuït, e finalizaram era hèsta pera net damb es huecs artificiaus.

Segontes eth baile de Vielha e Mijaran, Juan Antonio Serrano, “enguan, vos tornam a aufrir un programa fòrça ample e dirigit a tot tipe de publics. Credem qu’auem toti es ingredients entà que pogam auer ua setmana fòrça divertida entre familha e amics.”

Info: Ajuntament de Vielha e Mijaran

Esta noticia está disponible en: esEspañol