Era modificacion ascendís a 260.000 èuros | Apròve tanben un nau Plan Economic e Financèr

Er Ajuntament de Bossòst, amassat dijaus en un plen extraordinari, a aprovat era prumèra modificacion pressupostària der an, avalorada en 260.000 èuros. Aguest ampliament a de perméter afrontar es despenses restacades damb era reabilitacion dera bastissa des vestuaris e des grades deth camp de fotbòl municipau e damb er apariament de vials, pavimentacion de carrèrs e reforma de servicis urbans d’aigües en diuèrsi punts dera poblacion.
Eth baile Amador Marqués a explicat que “era reabilitacion des vestuaris deth camp de fotbòl ei ua accion de besonh pr’amor qu’era actuau bastissa sofrís problèmes enes sòns fondaments e ei afectat per grèus umiditats, que perjudicien era salubritat der equipament”. Aguesta òbra se finançarà a trauès deth Plan extraordinari d’inversions locaus dera Deputacion.

Atau madeish, Marqués a destacat que “eth rèste d’òbres, coma era pavimentacion deth carrèr der Aigua o era reposicion de trams deth hilat de distribucion d’aigua per naues canerades, ei part deth plan municipau entà méter ath dia es servicis urbans basics dera poblacion”.

Per d’auta part, er Ajuntament a aprovat un Plan Economic e Financèr (PEF), entàs ans 2018 e 2019, damb er objectiu de dar compliment ara nòrma de despensa, donques qu’aguesta se depassèc en 2017 per 13.000 èuros. Aguest incompliment ei a causa dera despensa extraordinària que li calec afrontar eth consistòri per indemnizacion patrimoniau, a trauès d’ua senténcia deth TSJC, per aucupacion dera finca a on se bastic era casèrna dera Guardia Civiu en an 1989.

Tant era modificacion pressupostària coma eth PEF an estat aprovadi damb eth vòt en favor deth grop de Unitat d’Aran (UA) e era abstencion de Convergéncia DemocraticaAranesa (CDA).

Info: Ajuntament de Bossòst

Esta noticia está disponible en: esEspañol