Eth Protocòl d’Intervencion damb ossi enes Pirenèus dejà ei aprovat. Prebotjat pera Generalitat de Catalunya e eth Conselh Generau d’Aran, eth document siguec elaborat peth Grop de Trabalh der Os Brun enes Pirenèus (format per tecnics deth Ministèri de Transicion Ecologica e des govèrns de Catalunya, Aran, Aragon e Navarra). Posterioraments, siguec sometut a consulta des administracions implicades per part deth Ministèri e ara a estat aprovat pera Comission Estatau entad Patrimòni Naturau e era Biodiversitat.

Eth protocòl servirà de referéncia entàs administracions competentes ena gestion dera fauna, ara ora de préner decisions deuant conductes atipiques de determinadi exemplars d’os. Atau, eth document se configure coma er esturment entà previer e resóler damb rapidesa e eficacia, entre d’auti, cassi de conflicte entre ossi e umans. Atau, respón ara volentat d’acordar per consens ua estrategia d’intervencion deuant possibles exemplars problematics.

Ena elaboracion deth document s’an agut en compde d’auti protocòls adoptadi en diuèrses poblacions d’Euròpa, coma eth Protocòl d’Intervencion sus ossi problematics des Pirenèus francesi e eth Protocòl de gestion d’ua situacion damb un os damb dificultats, elaboradi eth 2009 e 2017, respectivaments, peraOffice National de la Chasse et de la Faune Sauvage (ONCFS). Tanben eth Protocòl de trabalh dera equipa d’emergéncia entar os en Grècia, elaborat eth 2009 pera ONG Callisto, laguens deth projècte Life Pindos/Grevena; e eth Protocòl entara gestion e prevencion deth fenomèn des ossi abituadi e/o problematics enes Apenins, elaborat eth 2012 peth Parc Nacionau Abruzzo, Lazio e Molise, laguens deth projècte Life “Arctos”.

Definicion e recomanacions

Eth protocòl definís tres categories segons era sua conducta: er os abituat, er os problematic (damb tres soscategories: condicionat per recorsi tròfics d’origina umana, repetidaments predador, e er agressiu e perilhós) e er os damb problèmes. Tanben definís e recomane es caracteristiques minimes des equipes d’intervencion que cada comunitat damb competéncies ena matèria de fauna protegida a d’implementar enes zònes de preséncia establa d’os.

Distinguís tres fasas d’intervencion: ua prumèra de diagnostic, seguiment e execucion de mesures proactives e d’inici de mesures aversives (en tot aplicar tecniques de dissuasion); ua dusau de captura e marcatge der exemplar (se non ac està ja, coma en cas de Goiat, que ja pòrte colhar GPS) e de renfortiment de mesures aversives; e, s’eth Grop de Trabalh decidís passar ara darrèra fasa pr’amor qu’eth comportament non melhore, ua tresau que contemple era captura e retirada der exemplar. Fin finau, detalhe sies pautes d’intervencion segons es tipologies diferentes d’os:

  • deuant un os abituat
  • deuant un os condicionat per recorsi tròfics d’origina umana
  • deuant un os repetidaments predador
  • deuant un os agressiu e perilhós
  • deuant un os liberat e potenciauments conflictiu
  • deuant un os damb problèmes

Ath delà, eth Protocòl includís un apartat especific entà ossi liberadi e potenciauments conflictius, e permet mès flexibilitat ara ora d’actuar en tot tier en compde eth plus de  responsabilitat dera administracion en aguesti casi. Atau, en cas qu’aguest exemplar pogue méter en risc era viabilitat deth programa de consolidacion dera poblacion d’ossi en sòn conjunt, eth Grop de Trabalh avalorarà era convenença e possibilitat de retirar er exemplar.

El protocòl servirà de basa tà qu’es administracions implicades ena gestion der os brun enes Pirenèus poguen actuar deuant conductes atipiques de determinadi individus

Eth cas concrèt de Goiat

Damb es antecedents d’atacs constatadi pendent eth 2017 e eth 2018 per part der os Goiat e d’acòrd damb es definicions d’aguest protocòl, aguest exemplar a era consideracion d’os repetidaments predador. Per tant, en tot seguir eth procediment d’intervencion, pendent aguesta pròplèu primauera, en tot coïncidir damb era fin deth periòde d’ivernatge, ei previst refortilhar es mesures aversives entà sajar de modificar eth sòn comportament e, segons es resultats obtengudi, dempús dera avaloracion deth Grop de Trabalh der Os Brun enes Pirenèus, préner era decision d’acòrd damb çò qu’establís eth Protocòl.

Damb era aprobacion d’aguest Protocòl, se hè un pas mès en compliment dera huelha de rota que merquèc eth conseller de Territòri e Sostenibilitat dera Generalitat de Catalunya, Damià Calvet, eth passat mes de junhsèga e que desglossèc eth director generau de Politiques Ambientaus e Medi Naturau dera Generalitat de Catalunya, Ferran Miralles, ena ròda de premsa eth mes de seteme. Eth tot moment, des dera Generalitat s’a sostengut que Goiat a manifestat un comportament predador atipic aguesta sason; que non se descarte cap opcion, includida era de capturar-lo e trèir-lo deth medi; e qu’aguesta decision, se cau, requerirà d’un posicionament tecnic e d’un consens intergovernamentau.

Info: Conselh Generau d’Aran/ Departament de Territori i Sostenibilitat

Esta noticia está disponible en: esEspañol