Es alumnes deth Màster d’Atencion Pre-espitalària e Espitalària Urgenta MAPHU Presenciau IL-3 UB, realizen des deth passat dimèrcles e enquiath diuendres un talhèr practic de IMV (Incident damb Multiples Victimes) e Atencion de Montanha ena Val d’Aran.

Eth talhèr se realize en collaboracion damb eth Conselh Generau d’Aran damb era participacion deth personau sanitari d’Aran Salut e des Pompièrs d’Aran.

Er objectiu deth Mastèr ei coordinar eth trabalh deth personau sanitari damb eth personau d’emergéncies, entà méter en situacion es accions d’un e d’auti. Cau arrebrembar que mès deth 60% deth personau d’infermeria deth SEM (Sistèma d’Emergéncies Medicaus dera Generalitat de Catalonha), an passat peth Mastèr en Atencion Pre-espitalària e Espitalària Urgenta pendent es darrèri ans.

Es alumnes aquerissen coneishences sus materiau de montanha, manòbres de seguretat, foncionament e estructura deth Grop de Rescat de Montanha, coneishement deth materiau de rescat en iuèrn, tractament en ipotermia, reanimacion e sessions d’abiletat en atencion a multiples victimes, entre d’auti.

Eth Mastèr en Atencion Pre-espitalària  e Espitalària Urgenta ei organizat peth Conselh Generau d’Aran en collaboracion damb era Universitat de Barcelona, Pompièrs e Emergències d’Aran e er Institut de Formacion Contínua de Catalonha. Es activitats deth Mastèr compden damb era collaboracion deth Servici Aranés de Benéster e Salut (SABS) e dera enterpresa Habock Aviation Group.

Info: Conselh Generau d’Aran

Esta noticia está disponible en: esEspañol