Sies joeni aranesi s’an incorporat aguest mes de noveme ara estructura deth Conselh Generau d’Aran mejançant un contracte de practiques remunerades de 6 mesi de durada dempús d’auer-se acuelhut ath programa dera Garantia Juvenil.

Es gojats e gojates s’an incorporat as departaments de Secretaria, en relacion as prètzhèts d’implantacion dera Administracion electronica; Miei ambient e Gestion de Residus; Archiu Generau d’Aran; Musèus dera Val d’Aran; e Servicis Tecnics.

A trauès des programes dera Garantia Juvenil, eth Conselh Generau d’Aran a contractat a 14 joeni enes tres darrèri ans, tau e coma a explicat era conselhèra de Torisme e Desvolopament Economic d’Aran, Anna Díaz. Díaz, expliquèc ath delà que des deth Conselh Generau d’Aran s’a trabalhat intensaments pendent aguest temps amassa damb es responsables dera Garantia Juvenil dera Generalitat de Catalonha, entà qu’es joeni aranesi cada viatge coneishen mès totes es possibilitats que les aufrissen aguesti programes e se poguen beneficiar d’eri.

 

Era conselhèra Anna Díaz, a soslinhat qu’aguesta ei ua oportunitat entà que aguesti joeni contunhen en tot formar-se enes camps professionaus dirèctaments restacadi damb es sues titolacions academiques pr’amor que les serà utila ara ora d’aquerir experiéncia e les a convidat a aportar naues idèes e prepauses en cadun des àmbits as que s’incorpòren.

Era Garantia Juvenil ei ua iniciatiua europèa d’emplec entà redusir eth caumatge juvenil, impulsada en Catalonha a trauès deth Servici Public d’Emplec de Catalonha (SOC), e ena Val d’Aran en collaboracion damb eth Conselh Generau d’Aran a trauès deth Departament de Joenessa.

Entà accedir enes programes dera Garantia Juvenil cau auer entre 16 e 29 ans, e complir es requisits següents http://garantiajuvenil.gencat.cat/ca/que-es-garantia-juvenil/Requisits/

Entà mès información: http://garantiajuvenil.gencat.cat/ca/inici/

Info: Conselh Generau d’Aran

Esta noticia está disponible en: esEspañol