Representants deth Conselh Generau d’Aran e er Ajuntament de Vielha e Mijaran s’an amassat damb es responsables tecnics d’ambdues institucions entà tractar diuèrsi ahèrs urbanistics.

Per un costat, era modificacion de nòrmes entà possibilitar futures reformes en Espitau dera Val d’Aran a partir de demanes actuaus o futures coma son era implantacion d’ua caudèra de biomassa, era reorganizacion intèrna der airau d’Urgéncies e ua futura ampliacion.

En aguesta amassada s’a tractat tanben era perspectiva d’ampliar eth parc de Pompièrs de Vielha.

D’auta banda, s’a arribat ar acòrd de coordinar ambdues institucions entà resòlver era problematica des andròmines, petites edificacions en solèr non urbanizable qu’es proprietaris de finques rustiques hèn a servir coma magasèms d’estruments o entà barrar es animaus.

En darrèr lòc, era Comission d’Auviatge deth Conselh Generau d’Aran e er Ajuntament trabalharàn amassa ena redaccion des esturments de planejament entà facilitar era tramitacion de licéncies d’òbres enes nuclèus istorics, en tot hèr-les compatibles damb era proteccion deth patrimòni.

Info: Conselh Generau d’Aran