Eth departament de Territòri e Sostenibilitat dera Generalitat tramite er Avantprojècte de Lei de territòri, damb era corresponenta memòria generau e memòria d’avaloracion der impacte des mesures prepausades, sometut a informacion publica des deth passat 19 de mai.

Damb era fin de dar participacion ara ciutadania en procès d’elaboracion der Avantprojècte, e de conformitat damb çò establit en article 36.4 dera Lei 13/2008, de 5 de noveme, dera presidéncia dera Generalitat e deth Govèrn, er Avantprojècte s’a sometut a informacion publica pendent eth termini de vint (20) dies abils a compdar deth dia següent dera data de publicacion de dit Edicte en Diari Oficiau dera Generalitat de Catalonha.

Dempús d’un analisi der Avantprojècte, eth Conselh Generau d’Aran a formulat ua seria de prepauses e suggeriments qu’an per objècte:

  • Velhar pera defensa des competéncies arreconeishudes ath Conselh Generau d’Aran en vertut dera Lei 1/2015, de 5 de hereuèr, deth regim especiau d’Aran, en vigor des deth 14 de hereuèr de 2015. En aguest sens, se preten subervier en besonh qu’era futura Lei de Territòri arreconeishe explicitaments eth regim especiau d’Aran en matèria d’organizacion deth territòri e urbanisme, atau coma en toti aqueri ahèrs pròpries deth Dret administratiu (includides es institucions araneses) que suberven en mencionat Avantprojècte e qu’er Aran a arreconeishut eth pròpi regim.
  • Velhar, atau madeish, peth respècte entàs determinacions basiques contengudes en en vigor Plan director urbanistic dera Val d’Aran, en çò referent ath solèr non urbanizable (titolat coma “espacis dubèrti” en Avantprojècte de Lei). E açò en tot auer en compde qu’eth Plan director ei eth marc normatiu basic en matèria de planejament urbanistic qu’ei comun a tot eth territòri d’Aran e sorgís, en sòn actuau articulat (posterior ara modificacion deth Plan director iniciauments aprovat) d’un consens entre es ajuntaments dera Val d’Aran en determinadi ahèrs essenciaus deth nòste territòri.
  • Fin finau, deféner eth pròpi regim qu’er Aran preten entàs “espacis dubèrti”, tant en çò referent ara regulacion des bòrdes e cabanes, coma envèrs ath tractament deth solèr rustic en çò que tanh as possibilitats d’implantar naui bastiments, installacions o activitats.