Ua des accions destacades deth trabalh de cooperacion que desvolopen es municipis de Vielha e Mijaran, Benasque e Luchon, laguens deth projècte europèu “Poctefa-Reiaume der Aneto”, ère eth dessenh e metuda en foncionament d’ua estacion trail que tanben pogue connectar damb es auti dus municipis.

Aguesta estacion a coma objectiu potenciar era activitat de trail e hèr-la accessibla ath madeish temps a toti es publics, en tot dessenhar-se diuèrsi nivèus de dificultat e d’accès.

Segontes manifestaue Maria Vergés, dusau tinent d’alcalde de Vielha e Mijaran “era estacion de trail de Vielha e Mijaran pretén èster un element de dinamizacion toristica e tanben esportiua, qu’ajude ath nòste municipi a seguir en tot posicionar-se coma territòri de referéncia d’eveniments esportius mès tanben coma ua destinacion toristica de montanha” e higie que “eth projècte “Poctefa-Reiaume der Aneto” ei ua grana oportunitat entà, per un costat, bastir un sistèma de collaboracion damb es municipis vesins de Luchon e Benasque e establir ligams entre era populacion, e tanben entà crear diuèrsi productes toristics que poguen èster gestionadi e explotadi per empreses privades deth territòri, en tot potenciar atau tanben eth nòste desvolopament economic”.

Ei previst que pendent 2018 se presente eth projècte dera estacion e tanben que licite era execucion dera pròpria estacion.

Hònt: Ajuntament de Vielha e Mijaran